|
Félag Eldri Borgara er mjög virkur félagsskapur og hefur í ýmsu að snúast. Geta allir sem eru orðnir 60 ára gengið í félagið. Margar verslanir og fyrirtæki allt í kringum landið gefa félögum eldri borgara góðan afslátt gegn framvísun félagaskírteinis og er sjálfsagt fyrir félagana að nýta sér það.
Dagana 28 og 29 júní verður farið í tveggja daga ferð til Akureyrar og Hríseyjar. Á leiðinni norður verður stoppað í Varmahlíð. Á Akureyri fer leiðsögumaður með hópinn í skoðunarferð og einnig verða heimsótt eitt til tvö söfn eða fyrirtæki. Gist verður á Edduhóteli og þar verður einnig snæddur kvöldmatur. Seinni daginn verður farið út í Hrísey, er það um 15 mínútna sigling frá Árskógsströnd. Í Hrísey fær hópurinn hressingu; súpu,brauð og kaffi. Síðan verður farið í skoðunarferð um eyna á dráttavélum og vögnum. Á heimleiðinni verður farið um Dalvík, Ólafsfjörð og Lágheiði. Endar ferðin svo með kvöldverði á Gauksmýri. Ferðanefnd félagsins er mjög vel virk, en í henni eru Sigurður Sigurðsson, Guðrún Sigmundsdóttir og Ólafur Valdimarsson. En fleira er að gerast hjá félaginu: Sönghópur eldri borgara telur um 14 manns og æfir hann nær vikulega undir stjórn Helga S. Ólafssonar. Á mánudögum og fimmtudögum sér Stella Bára Guðbjörnsdóttir um föndrið. Á miðvikudögum koma nokkrir eldri borgarar saman í Nestúni til að spila, spjalla og fá sér kaffisopa. Fimmtudaginn 28. janúar verður þorrablót eldri borgara haldið í Nestúni og mun Jónína Jóhannesdóttir sjá um matinn eins og á undanförnum þorrablótum. Benni í Krossanesi og Bjössi á Borg munu sjá um dansmúsíkina, eins og vanalega á blótum félagsins. Um skemmtiatriði og annað í sambandi við þorrablótið sér þorrablótsnefndin ásamt ýmsum félögum eldri borgara. Formaður félagsins er Sigurbjörg María Guðmannsdóttir. |
