“Allt sem andardrátt hefur, lofi Drottin”  Þann 5. mars var alþjóðlegur bænadagur kvenna haldinn hátíðlegur á Melstað í Miðfirði í fimmta sinn.  

Að þessu sinni var beðið fyrir konum í Kamerún í Afríku.  Myndir, tónlist og texti kom frá konum í Kamerún sem á landamæri að sex löndum og er ýmist talið til Vestur-Afríku eða Mið-Afríku.  Landið er á stærð við Svíþjóð.  Yfirskriftin er tekin úr Sálm 150 - að allt sem andardrátt hafi skuli lofa Drottinn.  Þannig vilja konurnar frá Kamerún benda á tilgang lífsins, sem er að við hlúum hvert að öðru í stað þess að notfæra okkur aðrar manneskjur.

Henrike Wappler hefur haft yfirumsjón með bænadegi kvenna í Húnaþingi vestra og Bæjarhrepp.  Hún kemur frá Þýskalandi og kynntist þar bænadegi kvenna.  Hann var fastur liður í safnaðarstarfi í heimabæ hennar.

Á bænadaginn mættu 18 konur og 2 prestar,  þeir Magnús Magnússon og Guðni Þór Ólafsson.  Alls söfnuðust 9.001 kr fyrir Hið íslenska Bíbíufélag.

Hátíðin fór þannig fram að konur skiptust á að lesa texta; kynningu á landinu, bænir og ákall og Kristín Árnadóttir djákn las ritningarlestur. Á milli var sungið og flutt tónlist frá Kamerún.  Að hátíð lokinni í kirkju var gengið yfir í safnaðarheimili þar sem gestir gæddu sér á veitingum sem konur höfðu komið með og rekja má til landsins á einn eða annan hátt.  Þá var flutt tónlist og sýndar myndir frá landinu.